ପ୍ରକାଶ ପାଇଛି ଇଣ୍ଡିଆ ଜଷ୍ଟିସ୍ ରିପୋର୍ଟ । ରିପୋର୍ଟ ଅନୁସାରେ ନ୍ୟାୟ ପ୍ରଦାନରେ ଓଡ଼ିଶା ସବୁଠାରୁ ଭଲ । ଏଠାରେ ମିଳୁଛି ତୁରନ୍ତ ନ୍ୟାୟ, ଏପରି କି ପୋଲିସର ଫେକ୍ ଏନକାଉଣ୍ଟର ମଧ୍ୟ ନାହିଁ । ଥାନାକୁ ଗଲେ ପୋଲିସ ପୂର୍ବାପେକ୍ଷା ଭଲ ବ୍ୟବହାର ଦେଖାଉଛି । ସର୍ବଭାରତୀୟ ସର୍ଭେ ସଂସ୍ଥା ଇଣ୍ଡିଆ ଜଷ୍ଟିସ୍ ରିପୋର୍ଟ ଅନୁଯାୟୀ ଓଡ଼ିଶାରେ ନ୍ୟାୟ ପ୍ରଦାନରେ ଯଥେଷ୍ଟ ଉନ୍ନତି ଆସିଛି । ୨୦୨୨ରେ ଓଡ଼ିଶା ୧୦ମ ସ୍ଥାନରେ ରହିଛି । ଯାହା ଗ୍ରୀନ ଜୋନରେ ଆସୁଛି । ୨୦୨୦ରେ ଓଡ଼ିଶା ନ୍ୟାୟ ପ୍ରଦାନରେ ୧୧ତମ ସ୍ଥାନରେ ଥିଲା । ହେଲେ ଯେବେଠାରୁ ରାଜ୍ୟରେ ୫-ଟି ଓ ମୋ’ ସରକାର ବ୍ୟବସ୍ଥା ସକ୍ରିୟ ହୋଇଛି ସେବେଠାରୁ ନ୍ୟାୟ ପ୍ରଦାନ ଆହୁରି ତ୍ୱରାନ୍ୱିତ ହୋଇଛି । ଉତ୍ତରପ୍ରଦେଶ ୧୮ତମ ସ୍ଥାନରେ ରହି ସବୁଠାରୁ ତଳେ ରହିଛି । ଉତ୍ତରପ୍ରଦେଶ ଉପରକୁ ରହିଛି ପଶ୍ଚିମବଙ୍ଗ, ବିହାର ଓ ରାଜସ୍ଥାନ । ବିଶେଷକରି ବିଜେପି ଶାସିତ ରାଜ୍ୟଗୁଡିକ ଓଡ଼ିଶାଠାରୁ ପଛରେ ରହିଯାଇଛନ୍ତି ।

ଓଡ଼ିଶାରେ ଇ-ଗଭର୍ଣ୍ଣାନ୍ସ ହାଇକୋର୍ଟ ସର୍ବଶ୍ରେଷ୍ଠ କୋର୍ଟ ଭାବେ ସୁପ୍ରିମକୋର୍ଟଙ୍କ ଦ୍ୱାରା ପୁରସ୍କୃତ ହୋଇଛନ୍ତି । ସେହିପରି ପୋଲିସ ଓ ମାନବସମ୍ବଳ ପରିଚାଳନାରେ ଓଡ଼ିଶା ଚତୁର୍ଥ ର‌୍ୟାଙ୍କରେ ରହିଛି । ସବୁଠୁ ଶ୍ରେଷ୍ଠ ପୋଲିସ ଷ୍ଟେସନ ଭାବେ ଆସିକା ଥାନା କେନ୍ଦ୍ରର ସ୍ୱରାଷ୍ଟ୍ର ମନ୍ତ୍ରଣାଳୟ ଦ୍ୱାରା ବି ପୁରସ୍କୃତ ହୋଇଛି । ୨୦୨୪ସୁଦ୍ଧା ସବୁ ବ୍ଲକରେ ହେବ ଇ-କୋର୍ଟ । ୪ଟି ପାରାମିଟର ଯଥା ପୋଲିସ, ପ୍ରିଜିନ୍ସ, ଜୁଡିସିଆରୀ ଓ ଲିଗାଲ୍ ଏଡ୍ ଆଧାରରେ ସବୁ ରାଜ୍ୟ ପାଇଁ ଏହି ରିପୋର୍ଟ ପ୍ରସ୍ତୁତ ହୁଏ । ୧୦୦ଟି ଇଣ୍ଡିକେଟର ସହ ପ୍ରତ୍ୟେକ ରାଜ୍ୟରେ ବାସ୍ତବ ସ୍ଥିତି ଯାଞ୍ଚ୍ କରି କ୍ୟୁରେଟରମାନେ ଏହି ସର୍ଭେ କରିଥାଆନ୍ତି । ଏଥିରେ କୌଣସି ତ୍ରୁଟି ନଥାଏ ବୋଲି ସ୍ପଷ୍ଟ କରିଛନ୍ତି ପୂର୍ବତନ ପୋଲିସ ମହାନିର୍ଦ୍ଦେଶକ । ତହସିଲଠାରୁ କୋର୍ଟ ସବୁ କାର୍ଯ୍ୟ ଯେଭଳି ଅନଲାଇନ୍ ହେବ ସେ ନେଇ ରାଜ୍ୟସରକାର ପ୍ରସ୍ତୁତ କରିଛନ୍ତି ଭିତ୍ତିଭୂମି । ସବୁ ପଞ୍ଚାୟତ ହେବ ସ୍ମାର୍ଟ । ଆଗାମୀ ଦିନରେ ନ୍ୟାୟ ପ୍ରଦାନରେ ଓଡ଼ିଶା ସରକାର ୧ନଂ ମ୍ୟାପ୍ ପ୍ରସ୍ତୁତ କରୁଛନ୍ତି ବୋଲି ଜଣାପଡିଛି ।