ଅପରେସନ୍ ପାଇଁ ପେଟ କାଟିଦେଲେ । ହେଲେ ଅପରେସନ ନ ଆସିବାରୁ ପୁଣି ସିଲେଇ କରି ଅଧାରୁ ଛୁ’ ମାରିଲେ ଡାକ୍ତର । ଅପରେସନ୍ ଅଧାରେ ରୋଗୀକୁ ଟେବୁଲରେ ଛାଡି ପଳାଇଛନ୍ତି ଡାକ୍ତର ଜଣଙ୍କ । ଏଭଳି ଅଭାବନୀୟ ଘଟଣା ଘଟିଛି ବାଲେଶ୍ୱର ଜିଲ୍ଲା ଆଇଟିଆଇ ଛକରେ ଥିବା ଏକ ଘରୋଇ ନର୍ସିଂ ହୋମରେ । ସୂଚନା ମୁତାବକ କୁରୁଡାର ଗୀତାଞ୍ଜଳୀ ବିଶ୍ୱାଳଙ୍କ ପେଟରେ ପ୍ରବଳ ଯନ୍ତ୍ରଣା ହେବାରୁ ତାଙ୍କୁ ପୂର୍ବତନ ସିଡିଏମଓ ଡାକ୍ତର ଅନୁପ କୁମାର ଘୋଷଙ୍କ କ୍ଲିନିକରେ ଭର୍ତି କରିଥିଲେ ପରିବାର ଲୋକେ । ତୁରନ୍ତ ଗୀତାଞ୍ଜଳୀଙ୍କ ୟୁଟ୍ରସ୍ ବାହାର କରିବାକୁ ପରାମର୍ଶ ଦେଇଥିଲେ ଡାକ୍ତର ।

ପରେ ଡାକ୍ତରଙ୍କ ପରାମର୍ଶ ଅନୁସାରେ ଗୀତାଞ୍ଜଳୀଙ୍କ ସ୍ୱାମୀ ରଞ୍ଜନ ବିଶ୍ୱାଳ ସ୍ଥାନୀୟ ଜୟଶ୍ରୀ ହେଲଥ କେୟାରରେ ଆଡମିଶନ ନେଇଥିଲେ । ଡାକ୍ତର ଅନୁପ ଘୋଷ ଗୀତାଞ୍ଜଳୀଙ୍କର ଅପରେସନ କରିବା ବେଳେ ପେଟରେ ଅଧିକ ସମସ୍ୟା ଦେଖିବାକୁ ପାଇଥିଲେ । ଏଣୁ ଅପରେସନକୁ ଅଧାରୁ ଛାଡି କାଟିଥିବା ପେଟକୁ ପୁଣିଥରେ ସିଲେଇ କରି ନର୍ସିିଂହୋମରୁ ଛୁ’ ମାରିଲେ ଡାକ୍ତର ।ଯାହାକୁ ନେଇ ହସପିଟାଲରେ ଉତ୍ତେଜନା ଦେଖିବାକୁ ମିଳିଛି ।

ମଞ୍ଚ ଉପରେ ଚାଲୁଥିଲା ଯାତ୍ରା । ଯାତ୍ରାରେ ନାଚୁଥିଲେ ଜଲିଉଡ ଆଇଟମ୍ ଡ୍ୟାନ୍ସର ରାଣୀ ପଣ୍ଡା । ହେଲେ ତଳେ ଚାଲିଥିଲା ପ୍ରବଳ ଗଣ୍ଡଗୋଳ । ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା ଭଞ୍ଜନଗରଠାରେ ଆୟୋଜିତ ପଞ୍ଚୁଦଣ୍ଡ ଯାତ୍ରାରେ । ରାତିରେ ଆୟୋଜିତ ନାଟକ ପରିବେଷଣ ବେଳେ କିଛି ଯୁବକ ବିଶୃଙ୍ଖଳା ସୃଷ୍ଟି କରିଥିଲେ । ଏପରି କି ପରସ୍ପର ମଧ୍ୟରେ ହାତାହାତି ଓ ମାରପିଟ୍ ମଧ୍ୟ ହୋଇଥିଲା । ହେଲେ ଘଟଣାସ୍ଥଳରେ ଉପସ୍ଥିତ ଥିବା ପୋଲିସ ଓ ଗଣ୍ଡଗୋଳକାରୀଙ୍କୁ ଘଉଡାଇଦେଇଥିଲା । ସୂଚନା ମୁତାବକ ଭଞ୍ଜନଗର ଜିଲ୍ଲା ଭେଜିପୁଟଠାରେ ଆୟାଜିତ ପଞ୍ଚୁଦଣ୍ଡ ଯାତ୍ରାରେ ସ୍ଥାନୀୟ ଅଞ୍ଚଳର ୫ଟି ଦଣ୍ଡଯାତ୍ରା ଦଳ ଭାଗ ନେଇଥିଲେ । ରାତିରେ ଆୟୋଜନ ହୋଇଥିଲା ଯାତ୍ରା । ଏହି ସମୟରେ ଗୋଟିଏ ଯାତ୍ରା ପକ୍ଷରୁ ଜଲିଉଡ୍ ଅଭିନେତ୍ରୀ ରାଣୀ ପଣ୍ଡା ନୃତ୍ୟ ପରିବେଷଣ କରୁଥିଲେ । ହେଲେ ରାଣୀ ପଣ୍ଡାଙ୍କୁ ଦେଖିବା ପାଇଁ ଶହଶହ ଦର୍ଶକଙ୍କ ଭିଡ଼ ଲାଗିଥିଲା ।

ଏହି ସମୟରେ କିଛି ଅସାମାଜିକ ଯୁବକ ବିଶୃଙ୍ଖଳା କରିବାରୁ ଅନ୍ୟ ଗୋଷ୍ଠୀର ଯୁବକଙ୍କ ସହ ସେମାନଙ୍କର ମାଡ଼ପିଟ୍ ହୋଇଥିଲା । କିଛି ଯୁବକ ରାଣୀ ପଣ୍ଡାଙ୍କ ସହ ସେଲ୍ଫି ପାଇଁ ପରସ୍ପର ସହ ଗଣ୍ଡଗୋଳ କରିଥିଲେ । ଯଦିଓ ତାଙ୍କ ନୃତ୍ୟରେ କୌଣସି ଅଶ୍ଳୀଳତା ନଥିଲା ତଥାପି ତାଙ୍କ ସହିତ ଫଟୋ ଏବଂ ସେଲ୍ଫି ଉଠାଇବାକୁ ଯୁବଗୋଷ୍ଠୀଙ୍କ ମଧ୍ୟରେ ପ୍ରତିଯୋଗିତା ଲାଗିଥିଲା । ଏହି ସମୟରେ ଠେଲାପେଲା ହୋଇ ଗୋଷ୍ଠୀସଂଘର୍ଷ ଘଟିଥିଲା । ଏଥିରେ ଅନେକ ଆହତ ହୋଇଥିବା ଜଣାପଡିଛି ।

ପୁଣି କାୟା ମେଲାଇଲାଣି କରୋନା । ଏଣୁ ପୁନର୍ବାର ଫେରିଲା ମାସ୍କ୍ । ମେଡିସିନ ଷ୍ଟୋଠାରୁ ଆରମ୍ଭ କରି ଡ୍ରେସ ସୋ’ରୁମ୍ ଏବଂ ଫୁଟପାଥ୍ ସବୁଠି ମାସ୍କ ଦେଖିବାକୁ ମିଳୁଛି । କରୋନା ଆକ୍ରାନ୍ତଙ୍କ ସଂଖ୍ୟା ବଢୁଥିବା ବେଳେ ଏହାକୁ ଦୃଷ୍ଟିରେ ରଖି ଅନେକ ରାଜ୍ୟରେ ଏବେ ମାସ୍କ୍ ବାଧ୍ୟତାମୂଳକ କରାଯାଇଛି । ପୁଡୁଚେରୀ, କେରଳ ପରେ ଏବେ ହରିୟାଣା ସରକାର ମାସ୍କ ପିନ୍ଧିବା ବାଧ୍ୟତାମୂଳକ କରିଛନ୍ତି । ସର୍ବସାଧାରଣ ସ୍ଥାନକୁ ମାସ୍କ ପିନ୍ଧି ଯିବାପାଇଁ ନିର୍ଦ୍ଦେଶ ଦେଇଛନ୍ତି ହରିୟାଣା ସରକାର । ହରିୟାଣା ସ୍ୱାସ୍ଥ୍ୟ ବିଭାଗ ପକ୍ଷରୁ ଜାରି ହୋଇଥିବା ବୁଲେଟିନରେ ସୂଚନା ଦିଆଯାଇଛି, କରୋନା ସ୍ଥିତିର ସମୀକ୍ଷା ପାଇଁ ଏପ୍ରିଲ ୩ରେ ମୁଖ୍ୟମନ୍ତ୍ରୀ ମନୋହରଲାଲ ଖଟ୍ଟରଙ୍କ ଅଧ୍ୟକ୍ଷତାରେ ଏକ ବୈଠକ ଅନୁଷ୍ଠିତ ହୋଇଛି ।

ଯେଉଁଥିରେ ଏବେ ହରିୟାଣାରେ କରୋନା ସଙ୍କ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଛି । ଏଣୁ କରୋନା ବୃଦ୍ଧି ପାଉଥିବାରୁ ଏହାକୁ ନଜରରେ ରଖି ହରିୟାଣାରେ ମାସ୍କକୁ ବାଧ୍ୟତାମୂଳକ କରାଯାଇଛି । ଯେଉଁ ସ୍ଥାନରେ ଶହେରୁ ଅଧିକ ଲୋକ ଏକାଠି ହେଉଛନ୍ତି ସେଠାରେ ମାସ୍କ ବାଧ୍ୟତାମୂଳକ ବୋଲି ସରକାରଙ୍କ ପକ୍ଷରୁ ସୂଚନା ଜାରି କରାଯାଇଛି । ଏହାସହ କରୋନାର ବୃଦ୍ଧି ପାଉଥିବା ମାମଲାକୁ କଂଟ୍ରୋଲ କରିବାକୁ ଜିଲ୍ଲା ପ୍ରଶାସନ ଏବଂ ପଞ୍ଚାୟତଗୁଡିକୁ ମଧ୍ୟ ସତର୍କ ରହିବାକୁ ନିର୍ଦ୍ଦେଶ ଦିଆଯାଇଛି ।

ଗୁରୁ ବ୍ରହ୍ମା, ଗୁରୁ ବିଷ୍ଣୁ, ଗୁରୁଦେବ ମହେଶ୍ୱର, ଗୁରୁ ଶାକ୍ଷାତ୍ ପରମବ୍ରହ୍ମ ତସ୍ମୈଶ୍ରୀ ଗୁରବେ ନମଃ । କୁହାଯାଏ ଗୁରୁ-ଶିଷ୍ୟ ପରମ୍ପରା ଦୁନିଆର ସବୁଠାରୁ ପବିତ୍ର ଓ ନିଆରା । ଶିକ୍ଷକ ଦୁନିଆ ଦେଖାନ୍ତି, ପାଠ ପଢାଇ ଭଲ ମନ୍ଦ କ’ଣ ଜଣାନ୍ତି । ହେଲେ ଆଜିକାଲିର ଦୁନିଆରେ ଏଭଳି ଶିକ୍ଷକଙ୍କ ସଂଖ୍ୟା ଖୁବ୍ କମ୍ । ଏଭଳି ଜଣେ ନିଆରା ଶିକ୍ଷକଙ୍କୁ ଭିନ୍ନ ଢଙ୍ଗରେ ବିଦାୟକାଳୀନ ସମ୍ବର୍ନ୍ଧନା ଦେଇଛନ୍ତି ଛାତ୍ରଛାତ୍ରୀ । ଦୀର୍ଘ ୩୯ବର୍ଷର ଶିକ୍ଷାଦାନ ପରେ ଅବସର ନେଇଥିବା ଜଣେ ପ୍ରଧାନଶିକ୍ଷକଙ୍କୁ ଶହଶହ ଛାତ୍ରଛାତ୍ରୀଙ୍କ ସହ ଗ୍ରାମବାସୀ ବ୍ୟାଣ୍ଡ୍ ବାଜା ବଜାଇ ରଥରେ ବସାଇ ବିଦାୟକାଳୀନ ସମ୍ବର୍ନ୍ଧନା ଦେଇଛନ୍ତି ।

ଏଭଳି ଏକ ନିଆରା ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲ୍ଲା ବାଲିଆପାଳ ଅଞ୍ଚଳରେ । ଏକ ବର୍ଣ୍ଣାଢ୍ୟ ଶୋଭାଯାତ୍ରାରେ ବାଜା ରୋଷଣୀ ସହ ରଥରେ ବସାଇ ବିଦ୍ୟାଳୟଠାରୁ ୧୦କିଲୋମିଟର ଦୂର ଶିକ୍ଷକଙ୍କ ଘର ପର୍ଯ୍ୟନ୍ତ ଚାଲି ଚାଲି ଛାଡିଯାଇବାକୁ ଯାଇଥିଲେ ସମସ୍ତେ । ଏହି ବିଦାୟକାଳୀନ ସମ୍ବର୍ନ୍ଧନା ସମ୍ପୂର୍ଣ୍ଣ ଲୋକାରଣ୍ୟରେ ପରିଣତ ହୋଇଥିଲା । ବାଲିଆପାଳ ବ୍ଲକ୍ ଗଦାଧର ଗିରି ସରକାରୀ ଉଚ୍ଚବିଦ୍ୟାଳୟ ସୁନାରୁଇର ପ୍ରଧାନଶିକ୍ଷକ ନିରଞ୍ଜନ ପ୍ରଧାନଙ୍କୁ ଏଭଳି ନିଆରା ଢଙ୍ଗରେ ବିଦାୟ ସମ୍ବର୍ନ୍ଧନା ଦେଇଛନ୍ତି ଛାତ୍ରଛାତ୍ରୀ, ଅଭିଭାବକ, ଶିକ୍ଷକଶିକ୍ଷୟିତ୍ରୀ ଓ ଗ୍ରାମବାସୀ । ଏହି ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।

ରାଜ୍ୟରେ ମେ ମାସ ଶେଷ ସୁଦ୍ଧା ଯୁକ୍ତ ଦୁଇ ପରୀକ୍ଷା ଫଳ ପ୍ରକାଶ ପାଇବ । ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ସୂଚନାନୁସାରେ ଆସନ୍ତାକାଲିଠାରୁ ରାଜ୍ୟରେ ପ୍ରଥମ ପର୍ଯ୍ୟାତ ଖାତାଦେଖା ଆରମ୍ଭ ହୋଇ ଏପ୍ରିଲ ୨୩ ପର୍ଯ୍ୟନ୍ତ ଚାଲିବ । ଏହାପରେ ଦ୍ୱିତୀୟ ପର୍ଯ୍ୟାୟ ଖାତାଦେଖା ମେ ମାସ ୭ ତାରିଖରେ ଶେଷ ହେବ ।

ସୂଚନାଯୋଗ୍ୟ ମେ ପ୍ରଥମ ସପ୍ତାହରେ ଖାତା ଦେଖା ଶେଷ ହେବାପରେ ଟାବୁଲେସନ ପ୍ରକ୍ରିୟା କରାଯିବ । ଏବଂ ସମସ୍ତ କାର୍ଯ୍ୟ ସରିବା ପରେ ମେ ମାସ ଶେଷ ସୁଦ୍ଧା ପରୀକ୍ଷାଫଳ ପ୍ରକାଶ ପାଇବ । ଚଳିତ ବର୍ଷ ଖାତାଦେଖା ପାଇଁ ୬୫ଟି ଅଫଲାଇନ ସେଣ୍ଟର ହୋଇଥିବା ବେଳେ, ୩୯ଟି ଅନଲାଇନ ସେଣ୍ଟର ହୋଇଛି ।

କ୍ୟାନସର, ଏହାର ନାଁ ଶୁଣିବା ମାତ୍ରେ ଛାତିରେ ଛନକା ପଶିଯାଏ । ପ୍ରତିଦିନ ଭାରତରେ ଅନ୍ୟୁନ ହଜାର ହଜାର ବ୍ୟକ୍ତିଙ୍କର ଏହି ରୋଗରେ ଜୀବନ ଯାଉଛି । ଖୁବ୍ କମସଂଖ୍ୟକ ଲୋକ ଏହି ରୋଗରୁ ମୁକ୍ତି ପାଉଥିବା ବେଳେ ଅଧିକାଂଶଙ୍କର ଜୀବନହାନୀ ଘଟୁଛି । ଏପରିକ୍ଷେତ୍ରରେ ଆଗାମୀ ୨୦୩୦ସୁଦ୍ଧା ବିଶ୍ୱରେ କ୍ୟାନସର, ହୃଦରୋଗ ଓ ଅଟୋଇମ୍ୟୁୟନ ଭଳି ରୋଗ ପାଇଁ ଟିକା ପ୍ରସ୍ତୁତ ହୋଇଯିବ । ଯାହାଫଳରେ ପ୍ରତିବର୍ଷ ଏସବୁ ରୋଗରେ ପ୍ରାଣ ହରାଉଥିବା ଲକ୍ଷ ଲକ୍ଷ ଲୋକଙ୍କ ଜୀବନ ବଞ୍ଚାଯାଇପାରିବ । କୋଡିଡ୍‌-୧୯ ଟିକାର ସଫଳତା ପରେ କ୍ୟାନସର ଟିକାର ବିକାଶ ପ୍ରକ୍ରିୟା ତ୍ୱରାନ୍ୱିତ ହୋଇଛି । ଏହି ଟିକା ଉପରେ ଚାଲିଥିବା ଅଧ୍ୟୟନ ବେଶ୍ ସଫଳ ହୋଇଛି ବୋଲି ବିଶେଷଜ୍ଞମାନେ ଦାବି କରିଛନ୍ତି ।

ଏହି ବିଶେଷଜ୍ଞ ଟିମ୍ କହିଛନ୍ତି, ଗତ ୧୫ବର୍ଷ ହେବ କ୍ୟାନସର ଟିକା ବିକାଶ ଲାଗି ଗବେଷଣା ଜାରି ରହିଥିଲା । କିନ୍ତୁ କୋଭିଡ୍ ଟିକା ସଫଳ ହେବା ପରେ ୧୨ରୁ ୧୮ମାସ ଭିତରେ କ୍ୟାନସର ଟିକାର ବିକାଶ କ୍ଷେତ୍ରରେ ବେଶ୍ ଉଲ୍ଲେଖନୀୟ ଅଗ୍ରଗତି ଘଟିଛି । ମଡର୍ଣ୍ଣା ଫାର୍ମାସ୍ୟୁଟିକାଲ୍ କମ୍ପାନୀର ମୁଖ୍ୟ ମେଡିକାଲ ଅଫିସର ଡକ୍ଟର ପଲ୍ ବର୍ଟନଙ୍କ ସୂଚନା ଅନୁସାରେ ତାଙ୍କ କମ୍ପାନୀ ଏବେ ବିଭିନ୍ନ ପ୍ରକାର କ୍ୟାନସର ଟିକା ବିକାଶରେ ଲାଗିପଡ଼ିଛି । ଯାହାକି ବିଭିନ୍ନ ପ୍ରକାର ଟ୍ୟୁମରକୁ ଟାର୍ଗେଟ୍ କରିପାରିବ । ହୁଏତ ଆଗାମୀ ୫ବର୍ଷରୁ କମ୍ ସମୟ ଭିତରେ ଏହି ଟିକା ଉପଲବ୍ଧ ହୋଇପାରିବ । କେବଳ କ୍ୟାନସର ଟିକା ନୁହେଁ କୋଡିଡ୍‌, ଫ୍ଲୁ ଏବଂ ଆରଏସଭି ଭଳି ଏକାଧିକ ଶ୍ୱାସକ୍ରିୟାଜନିତ ରୋଗରୁ ସମ୍ବେଦନଶୀଳ ବ୍ୟକ୍ତିଙ୍କୁ ସୁରକ୍ଷା ଦେବା ଲାଗି ଏକକ ଇଞ୍ଜେକସନର ମଧ୍ୟ ବିକଶିତ ହେଉଛି । ଏହାସହ ବର୍ତମାନ ଔଷଧ ମିଳୁନଥିବା କେତେକ ବିରଳ ରୋଗର ଚିକିତ୍ସା ପାଇଁ ଏନଆରଏନଏ ଥେରାପି ମଧ୍ୟ ଆଗାମୀ କିଛିବର୍ଷ ଭିତରେ ଉପଲବ୍ଧ ହୋଇପାରିବ ବୋଲି ଡକ୍ଟର ବର୍ଟନ୍ କହିଛନ୍ତି ।