ଚର୍ଚ୍ଚାରେ ଗୋଲ୍ଡମ୍ୟାନଙ୍କ ଗୋଲ୍ଡ କୁଲଫି

ଗ୍ରୀଷ୍ମଋତୁରେ କୁଲଫିର ମଜା ସବୁଠୁ ନିଆରା । ଏହାର ଥଣ୍ଡା ଓ ମିଠା ସ୍ୱାଦ କେବଳ ଗରମରୁ ଯେ ଆରାମ ଦେଇଥାଏ ତାହା ନୁହେଁ । ଏହା ପାଟିକୁ ବି ଲାଗେ ବେଶ୍ ସୁଆଦିଆ । ଏବେ ବଜାରରେ ପ୍ଲେନ୍ କୁଲଫି, ପିସ୍ତା କୁଲଫି, ଆମ୍ବ ଏବଂ ବାଦାମ୍ କୁଲଫି ମିଳୁଛି । ହେଲେ ଏବେ ଭାରତରେ ସୁନାର କୁଲଫିକୁ ନେଇ ଚର୍ଚ୍ଚା ଜୋର ଧରିଛି । ଇନ୍ଦୋର ସହରରରେ ଜଣେ ବ୍ୟକ୍ତି ସୁନା କୁଲଫି ବିକ୍ରି କରୁଥିବାର ଦୃଶ୍ୟ ଏବେ ସୋସିଆଲ ମିଡ଼ିଆରେ ବେଶ୍ ଭାଇରାଲ ହେବାରେ ଲାଗିଛି ।

ଯାହାକୁ ଲୋକେ ମଧ୍ୟ ବହୁ ପସନ୍ଦ କରୁଛନ୍ତି । ଇନ୍ଦୋର ସହରରେ ରୁହନ୍ତି ବଣ୍ଟି ଯାଦବ । ପିଲାଟିବେଳୁ ତାଙ୍କର ସୁନାପ୍ରତି ରହିଆସିଛି ସ୍ୱତନ୍ତ୍ର ଦୁର୍ବଳତା । ଖାସ୍ ଏଥିପାଇଁ ସେ ସବୁଦିନ କୋଟି କୋଟି ଟଙ୍କାର ସୁନା ଅଳଙ୍କାର ବି ପିନ୍ଧିଥିବାର ଦେଖାଯାଏ । ସେ ସ୍ଥାନୀୟ ଅଞ୍ଚଳରେ ଗୋଲ୍ଡ ମ୍ୟାନ୍ ଭାବେ ବେଶ୍ ଜଣାଶୁଣା ମଧ୍ୟ । ଏବେ ସେ ସୁନାର କୁଲଫି ବିକ୍ରି କରୁଛନ୍ତି । ଫଟୋରେ ଦେଖିବାକୁ ମିଳିଛି ବଣ୍ଟି କିଲୋ କିଲୋ ସୁନା ଅଳଙ୍କାର ପିନ୍ଧିଛନ୍ତି । ସେ ଫ୍ରିଜରୁ କୁଲଫି ଖଣ୍ଡ ବାହାର କରି ୨୪କ୍ୟାରେଟ୍ ସୁନା ଫଏଲରେ ଗୁଡାଇ ରଖୁଛନ୍ତି । ଏହି କୁଲଫିର ମୂଲ୍ୟ ହେଉଛି ମାତ୍ର ୩୫୧ଟଙ୍କା । ଏହି ବ୍ୟକ୍ତିଜଣଙ୍କୁ ଇନ୍ଦୋରର ସାଫାର ଅଞ୍ଚଳରେ ପ୍ରକାଶ କୁଲଫି ବୋଲି ଲୋକେ ଜାଣନ୍ତି ।

ହେଲେ ଏହି ଫଟୋଟିକୁ ଦେଖିବା ପରେ ଅନେକ ନକାରାତ୍ମକ ମନ୍ତବ୍ୟ ବି ଦେଉଛନ୍ତି । କେହି କେହି ଏହାକୁ ସୁନାର ଅଯଥା ଅପଚୟ ବୋଲି କହୁଥିବା ବେଳେ ଆଉ କେତେକ ବଣ୍ଟି ଯାଦବଙ୍କ ସୁନା କୁଲଫି ଖାଇବାକୁ ବେଶ୍ ପସନ୍ଦ ବି କରୁଛନ୍ତି । ଦୋକାନରେ ପ୍ରତିଦିନ ଶହ ଶହ ଲୋକଙ୍କ ଭିଡ ବି ଜମୁଛି । କାରଣ ଏହି କୁଲଫି ଯେ କେବଳ ସୁନାର ଫଏଲରେ ପ୍ୟାକ୍ ହୋଇଛି ତାହା ନୁହେଁ ଏହାର ଟେଷ୍ଟ୍ ମଧ୍ୟ ଅନ୍ୟ କୁଲଫି ତୁଳନାରେ ସ୍ୱତନ୍ତ୍ର ବୋଲି କହୁଛନ୍ତି ଅନେକ ଗ୍ରାହକ ।