୨୦୨୪ ନିର୍ବାଚନ ପାଇଁ ବ୍ଲୁ ପ୍ରିଂଟ୍ ପ୍ରସ୍ତୁତ । ଆରମ୍ଭ ହୋଇଗଲାଣି ଅଙ୍କକଷା । ନିର୍ବାଚନ ପାଇଁ ଏବେଠୁ ବଡ଼ ତୟାରୀ କଲାଣି ଓଡ଼ିଶାର ଶାସନ କ୍ଷମତାରେ ଥିବା ବିଜେଡ଼ି । ହେଲେ ଆସନ୍ତା ନିର୍ବାଚନରେ କାହାର ଟିକେଟ୍ କଟିବ କିଏ ପାଇବେ ଆଉ କେଉଁ ନୂଆ ଚେହେରା ସାମିଲ ହେବେ । ଏହାକୁ ନେଇ ଶାସକ ବିଜେଡ଼ି ପକ୍ଷରୁ ଆରମ୍ଭ ହୋଇଛି ସର୍ଭେ । ହେଲେ ଚଳିତ ନିର୍ବାଚନରେ ୫୦ପ୍ରତିଶତ ପ୍ରାର୍ଥୀଙ୍କ ଟିକେଟ୍ କଟିବା ଥୟ ,
୨୦୧୯ ନିର୍ବାଚନରେ ସାଂସଦ ପ୍ରାର୍ଥୀ ହୋଇଥିବା ଅଧା ପ୍ରାର୍ଥୀଙ୍କ ଟିକେଟ୍ କଟିବ ବୋଲି ଏବେ ବିଜେଡ଼ିର ଅନ୍ଦରମହଲରେ ଜୋରଦାର ଚର୍ଚ୍ଚା ହେଉଛି । ୨୦୧୯ରେ ବିଜେଡ଼ିର ୧୨ଜଣ ନେତା ସାଂସଦ ଭାବେ ନିର୍ବାଚିତ ହୋଇଥିଲେ । କେନ୍ଦୁଝର, ଭଦ୍ରକ, ଯାଜପୁର, ଢେଙ୍କାନାଳ, ନବରଙ୍ଗପୁର, କନ୍ଧମାଳ, କଟକ, କେନ୍ଦ୍ରାପଡ଼ା, ଜଗତସିଂହପୁର, ପୁରୀ, ଆସ୍କା ଓ ବ୍ରହ୍ମପୁରରେ ବାଜିମାତ୍ କରିଥିଲା ବିଜୁ ଜନତା ଦଳ । ତେବେ ୨୦୨୪ରେ କିନ୍ତୁ ଅଧା ସାଂସଦଙ୍କ ଟିକେଟ୍ କଟିବା ଏକପ୍ରକାର ନିଶ୍ଚିତ ।
୨୦୧୯ରେ ସବୁଠାରୁ ଅଧିକ ଚର୍ଚ୍ଚାରେ ଥିଲେ ସୁପରଷ୍ଟାର ଅନୁଭବ ମହାନ୍ତି । କେନ୍ଦ୍ରାପଡ଼ାରେ ବୈଜୟନ୍ତ ପଣ୍ଡାଙ୍କ ଭଳି ହେଭିୱେଟ୍ ନେତାଙ୍କୁ ସେ ପରାସ୍ତ କରିବାରେ ସକ୍ଷମ ହୋଇଥିଲେ । ପରେ ନବୀନଙ୍କ ବେଶ ପ୍ରିୟ ବନିଯାଇଥିଲେ ଅନୁଭବ । ହେଲେ ଏବେ ସେ ପାରିବାରିକ ବିବାଦ ମାମଲାରେ ଛନ୍ଦି ହୋଇଯାଇଛନ୍ତି । ବର୍ଷା ପ୍ରିୟଦର୍ଶିନୀଙ୍କ ସହ ବିବାଦ ଆରମ୍ଭ ହେବାପରଠାରୁ ବିଜେଡ଼ିରେ ଏବେ କୋଣଠେଣା । ତେଣୁ ତାଙ୍କର ଟିକେଟ୍ କଟିବା ଏକ ପ୍ରକାର ନିଶ୍ଚିତ । ସେହିପରି ବିଜେଡ଼ିର ଆଉଜଣେ ହେଭିୱେଟ୍ ନେତା ହେଉଛନ୍ତି ପୁରୀ ସାଂସଦ ପିନାକୀ ମିଶ୍ର ।
୨୦୧୯ରେ ସେ ମାତ୍ର ୧୧ହଜାର ଭୋଟରେ ନିଜର ନିକଟତମ ପ୍ରତିଦ୍ୱନ୍ଦ୍ୱୀ ତଥା ବିଜେପି ପ୍ରାର୍ଥୀ ସମ୍ବିତ୍ ପାତ୍ରଙ୍କୁ ପରାସ୍ତ କରିଥିଲେ । ମାତ୍ର ନିର୍ବାଚନରେ ବିଜୟଲାଭ ପରଠାରୁ ଆଉ ତାଙ୍କୁ ପୁରୀ ସଂସଦୀୟ କ୍ଷେତ୍ରରେ ଦେଖିବାକୁ ମିଳୁନି ବୋଲି ଅଭିଯୋଗ ହେଉଛି । ଏପରି କି ସେ ଆସନ୍ତା ଲୋକସଭା ନିର୍ବାଚନ ଲଢିବାକୁ ଚାହୁଁନଥିବା ମଧ୍ୟ ଚର୍ଚ୍ଚା ହେଉଛି । ଲୋକସଭା ବଦଳରେ ରାଜ୍ୟସଭା ସାଂସଦ ହେବା ପାଇଁ ମନ ବଳାଇଲେଣି ପିନାକୀ ମିଶ୍ର । ସେହିପରି ଏବେ ଢେଙ୍କାନାଳ ସାଂସଦ ଅଛନ୍ତି ମହେଶ ସାହୁ । ଗତ ନିର୍ବାଚନରେ ସେ ୩୫ହଜାର ଭୋଟରେ ବିଜୟୀ ହୋଇଥିଲେ । ଜଣେ ଦୃଢ ସଙ୍ଗଠକ ଭାବେ ତାଙ୍କର କ୍ଷାତି ମଧ୍ୟ ରହିଛି ।
ହେଲେ ସେ ଏବେ ନିଜ ସଂସଦୀୟ କ୍ଷେତ୍ରର ଅଧିକାଂଶ ବିଧାୟକଙ୍କ ବିରୋଧୀ ପାଲଟିଗଲେଣି । ତେଣୁ ତାଙ୍କୁ ମଧ୍ୟ ବିଜେଡ଼ି ଆଉ ଟିକେଟ୍ ଦେଇ ରିସ୍କ ନେବନି ବୋଲି ଜୋରଦାର ଚର୍ଚ୍ଚା ହେଉଛି । ନବରଙ୍ଗପୁର ସାଂସଦ ରମେଶ ମାଝୀଙ୍କୁ ବି ୨୦୨୪ରେ ଟିକେଟ୍ ମିଳିନପାରେ । ତାଙ୍କ ବଦଳରେ ପ୍ରଦୀପ ମାଝୀ ସାଂସଦ ପ୍ରାର୍ଥୀ ପାର୍ଥୀ କରିପାରେ ଦଳ । ଏମିତିରେ ବି ରମେଶ ନିଜର ଅନିଚ୍ଛା ସତ୍ୱେ ୨୦୧୯ରେ ଲୋକସଭା ନିର୍ବାଚନ ଲଢିଥିଲେ । ବିଧାୟକ ହୋଇ ରମେଶ ମନ୍ତ୍ରୀ ହେବାକୁ ଚାହୁଁଛନ୍ତି ବୋଲି ନବରଙ୍ଗପୁରରେ ଜୋରଦାର ଚର୍ଚ୍ଚା ହେଉଛି । ସେହିପରି ପ୍ରମିଳା ବିଷୋଇଙ୍କ ଭଳି ଜଣେ ସାଧାରଣ ମହିଳାଙ୍କୁ ଆସ୍କା ସାଂସଦ ଟିକେଟ୍ ଦେଇ ଚମକାଇ ଦେଇଥିଲେ ବିଜେଡ଼ି ସୁପ୍ରିମୋ ନବୀନ ପଟ୍ଟନାୟକ । ସଂସଦରେ ବି ପ୍ରମିଳାଙ୍କୁ ବେଶ୍ ପ୍ରଶଂସା କରାଯାଉଛି ।
ତେବେ ୨୦୨୪ରେ ତାଙ୍କୁ ବିଜେଡ଼ି ରିପିଟ୍ କରିବାକୁ ଚାହୁଁନଥିବା ରାଜନୈତିକ ମହଲରେ ଚର୍ଚ୍ଚା ଜୋର ଧରିଛି । ତାଙ୍କ ବଦଳରେ ଦଳ ଆଉଜଣେ ନାରୀ ନେତ୍ରୀଙ୍କୁ ପ୍ରାର୍ଥୀ କରିବାକୁ ଯୋଜନା କରୁଛି । ଏଣୁ ଏବେ କେନ୍ଦ୍ରାପଡ଼ା, ପୁରୀ, ଢେଙ୍କାନାଳ, ନବରଙ୍ଗପୁର ଓ ଆସ୍କା ସାଂସଦଙ୍କ ଟିକେଟ୍ କଟିବା ନେଇ ଚର୍ଚା ହେଉଛି । ଏହାସହିତ ମଧ୍ୟ ଆଉ କେତେକ ସାଂସଦଙ୍କ ଉପରେ ଝୁଲୁଛି ଖଣ୍ଡା । ଭଦ୍ରକ ସାଂସଦ ଥିବା ମଞ୍ଜୁଲତା ମଣ୍ଡଳଙ୍କ ସ୍ୱାମୀ ମୁକ୍ତିକାନ୍ତ ମଣ୍ଡଳ ବିଧାନସଭା ନିର୍ବାଚନ ଲଢିବାକୁ ଇଚ୍ଛା ପ୍ରକାଶ କରିଛନ୍ତି । ଯଦି ମୁକ୍ତିକାନ୍ତ ଧାମନଗରରୁ ନିର୍ବାଚନ ଲଢନ୍ତି ତେବେ ମଞ୍ଜୁଲତାଙ୍କ ଟିକେଟ୍ କଟିବା ନିଶ୍ଚିତ । ସେହିପରି କଟକ ସାଂସଦ ଭତୃହରି ମହତାବଙ୍କ ଟିକେଟ କଟିବା ଏକପ୍ରକାର ନିଶ୍ଚିତ । ଏପରି କି ଗତ ୨୦୧୯ରେ ବି ତାଙ୍କୁ ଟିକେଟ୍ ମିଳିବନି ବୋଲି ଚର୍ଚ୍ଚା ହେଉଥିଲା ।
ଜଗତସିଂହପୁର ସାଂସଦ ରାଜଶ୍ରୀ ମଲ୍ଲିକ ତିର୍ତୋଲରୁ ନିର୍ବାଚନ ଲଢିବାକୁ ଚାହୁଁଥିବାରୁ ଜଗତସିଂହପୁରରେ ବି ପ୍ରାର୍ଥୀ ପରିବର୍ତନ କରିପାରେ ବିଜେଡ଼ି । ସେହିପରି ଦେଶର ସର୍ବକନିଷ୍ଠ ସାଂସଦ ଚନ୍ଦ୍ରାଣୀ ମୁର୍ମୁଙ୍କ ଟିକେଟକୁ ନେଇ ବି ପ୍ରଶ୍ନବାଚୀ ସୃଷ୍ଟି ହୋଇଛି । ଏଣୁ ଆସନ୍ତା ୨୦୨୪ ସାଧାରଣ ନିର୍ବାଚନରେ ଅଧା ସାଂସଦଙ୍କ ଟିକେଟ୍ କଟିବା ଏକ ପ୍ରକାର ନିଶ୍ଚିତ । ବିଶେଷକରି ୨୦୨୪ରେ ନବୀନ ଅନେକ ନବାଗତଙ୍କୁ ସାଂସଦ ଟିକେଟ୍ ଦେବେ ବୋଲି ବିଜେଡ଼ି ଅନ୍ଦରମହଲରେ ଚର୍ଚ୍ଚା ଜୋର ଧରିଛି ।
